Region Stockholmista meänkielelä

Puliittinen organisasjuuni sisältää rekiuunivaltuuston, rekiuunihallinon, sekä lautakuntia, komiteoita ja valmistelu työköuntia. Rekiuunivaltuusto on Region Stokholmin korkein päättävä orgaani. Sie joka olet asukas Region Stokholmissa saatat joka neljäs vuosi äänestää niitä pulitiikkeriä kestä sie tykkäät pitävät istua rekiuunivaltuustossa. Sen sie tehet ylheisissä vaalissa samala kun sie äänestät Ruottin valtiopäivile ja Stokholmin kunnanvaltuusthoon.

Terhveys- ja siukkahoito 

Region Stockholm on vastuussa ette sie joka asut Stokholmin läänissä saat sen terhveys- ja siukkahoijon mitä sie tarttet. Terhveys- ja siukkahoito on meän laajiin toiminta, noin 80% bydjetistä mennee siihen. Toiminta käsittelee siukkahoitoa ja terhveyttä eistävää työtä, ja tutkimusta, koulutusta ja kehitystä. 

Hammashoito 

Meilä on kans ylikattava vastuu ette sulla on hammashoitoa käytettävänä. Region Stokholm kostantaa lasten ja nuoritten hammashoitoa sekä erikoista hammashoitotukea henkilöile, joila on laaja tarve hoijosta ja huolosta.

Potilaslautakunta 

Jos sulla on valituksia hoijosta mitä sie eli joku lähimäinen on saanu sie voit kääntyä potilaslautakunthaan joka saattaa auttaa sinua ette sie saat vastauksen hoijonantajalta. 

Kolektiivitrafiikki

Met olema kans vastuussa läänin kolektiivitrafiikista ja kattoma perhään ette sie saatat reisata byssilä, tynnelbaanala, pendelijunala, paikalisbaanala ja saaristovenheelä. Just nyt met tehemä suuren investeerinkin kolektiivitrafiikhiin muun muassa lajentamalla tynnelbaanaa Barkarbyhyn, Nackhaan ja Arenastadhiin. 

Rekiunaalinen kehitys

Yks muu vastuunala on ette johtaa ja koortineerata työtä stokholminrekiuunin kestävää kehitystä. Met suunittelema missä met piämä rakentaa työpaikkoja ja asuntoja ja kattoma perhään ette on balansi ekonoomisen kasvun, sosiaalisen turvan ja miljöösuojan välissä.

Kulttuuri 

Met olema töissä ette lisätä kulttuurin käyttävyyttä ja vaikuttaa ette osalistuminen ja koulutus lissäintyy. Met olema vastuussa kans kulttuurialan, kansankoulutuksen ja urheilu- ja föreeninki elämän ekonoomisesta tuesta. Net toiminat jokka saavat rahalista tukea pitävät yhessä sisältää moninaista kulttuurista ja taitheelista ilmaisuja, ääniä ja metuutia.